Грчките власти ја пролонгираа примената на новото правило според кое сите возачи што влегуваат во земјата ќе мора да имаат нов вид комплет за прва помош во своите возила. Наместо од 18 јуни годинава, обврската ќе стапи на сила од 1 јануари 2027 година.
Одлуката веќе е официјално објавена во Службениот весник на Грција.
Со новите прописи, возачите ќе треба да поседуваат комплет за прва помош што содржи 16 задолжителни елементи, меѓу кои спасувачка термо-прекривка, стерилни завои во различни димензии, еластични завои, ножици, медицински ракавици, маски и упатство со илустрации за укажување прва помош.
На листата се вклучени:
- Изотермална спасувачка прекривка
- Лента за фиксирање
- Самолепливи фластери во повеќе димензии
- Мал стерилен завој
- Среден стерилен завој
- Голем стерилен завој
- Стерилна газа или преврска за изгореници
- Компреси за третман на рани
- Тесен еластичен завој
- Широк еластичен завој
- Триаголен завој за имобилизација
- Ножици за прва помош
- Медицински ракавици за еднократна употреба
- Влажни марамчиња за дезинфекција
- Заштитни маски за лице
- Илустрирано упатство за прва помош
За возачите кои нема да го поседуваат задолжителниот комплет е предвидена парична казна во износ од 30 евра.
Веста ја пренесува Skopje1.mk
