Голем сообраќаен притисок се создаде на граничните премини меѓу Македонија и Грција по завршувањето на продолжениот викенд, кога голем број туристи се враќаат дома. Најтешка е состојбата на преминот Евзони/Богородица, каде задржувањата достигнуваат и до три часа.
Според изјави на патници, колоните од возила се долги неколку километри, а движењето е значително забавено. Како една од главните причини се посочува воведувањето на новиот европски систем за влез и излез (EES), кој носи дополнителни проверки, вклучително и биометриска идентификација.
Зголемена фреквенција има и на граничниот премин Дојран, каде времето на чекање е околу еден час. Метеж се бележи и на преминот Блаце, со колони во двата правци.
Надлежните предупредуваат дека ваквата состојба најверојатно ќе продолжи и во текот на наредните часови, сè додека не се намали интензитетот на враќањето на патниците.
Веста ја пренесува 24chasa.mk
