Пред Основниот суд денеска се појави Фатон Љури – лицето кое на 1 јули со мотор го удри скопјанецот Југослав Николовски, познат меѓу соседите како дедо Југо. Љури пред судот потврди дека токму тој го предизвикал судирот, но истовремено нагласи дека не ја напуштил местото без да укаже помош.
„Се чувствувам виновен за несреќата, никој не сака вакво нешто да се случи. Изразувам искрено сочувство до семејството. Му укажував помош, таму беа и двајца полицајци,“ изјави тој во судницата.
Од Обвинителството, пак, тврдат спротивно – дека по несреќата Љури го оставил повредениот Николовски да лежи на патеката облеан во крв и се оддалечил од местото. Тие истакнаа дека ќе докажат дека моторџијата го прегазил Николовски додека тој излегол да фрли ѓубре и потоа избегал, оставајќи го мотоциклот зад себе.
„Иако Николовски бил во тешка состојба, обвинетиот го напуштил местото и не укажал никаква помош. За разлика од него, неговиот сопатник Ибрахим Хамза, иако повреден, останал таму и чекал да пристигне полицијата и итната помош,“ рече обвинителката.
Несреќата се случила доцна вечерта на 1 јули. Од ударот Николовски се здобил со тешки телесни повреди и починал следното утро, додека сопатникот на моторот поминал со полесни повреди. Љури, според истрагата, пеш го напуштил местото на настанот.
Полицијата утврдила дека обвинетиот и во минатото имал прекршоци – едно дело за насилство во 2016 година и прекршок за непочитување на ковид-мерките во 2021 година.
