Фото: Принтскрин
Испораката на крстосувачки ракети „Томахавк“ за Украина би можела сериозно да влијае врз одлуките на рускиот претседател Владимир Путин, кој и понатаму одбива мировни преговори за да не покаже слабост. Ова го изјави постојаниот претставник на САД при НАТО, Метју Витакер, на конференција во Рига.
„Имаме капацитети кои засега не се распоредени во Украина – исклучително моќни системи, способни да предизвикаат голема штета на место и во време што ние ќе го избереме. Некои од нив би можеле да бидат преместени во Украина за идна употреба, што би ја променило калкулацијата на Путин,“ нагласи Витакер, кој во првиот мандат на Доналд Трамп ја извршуваше функцијата државен јавен обвинител.
Тој додаде дека Кремљ речиси панично реагирал и на самата можност за испраќање на „Томахавк“ ракети, но и покрај тоа Путин не покажува подготвеност за преговори. „Очигледно, сè уште не сме дојдени до моментот кога Путин ќе одлучи дека е време за мировен процес. Проблемот е што тој не може да си дозволи да изгледа слаб, иако реално е во многу слаба позиција,“ изјави американскиот дипломат.
Во тој контекст Витакер потсети дека Доналд Трамп некогаш ја нарекол Русија „хартиен тигар“, додека руските претставници инсистираат дека се „мечка“. „Генералниот секретар на НАТО, Марк Руте, најдобро го сумираше тоа: ‘Вистинската мечка не мора да докажува дека е мечка, таа едноставно е’“, нагласи тој.
Витакер ја потенцираше и слабата ефикасност на руската армија: „Да тргнел полжав од руско-украинската граница пред три и пол години, досега ќе стигнеше во Полска. Русите, пак, не успеаја да освојат ниту 20 отсто од украинската територија, што покажува колку нивната војска е неспособна и неефикасна.“
