Висок претставник на Белата куќа потврди за BBC дека администрацијата на претседателот Доналд Трамп била „информирана“ за израелскиот напад врз Доха уште пред тој да се случи.
Нападот врз Катар – држава која претставува важен сојузник на САД надвор од НАТО – веднаш отвори серија прашања за степенот на американска вклученост и информираност, особено ако се земе предвид дека во земјата се стационирани околу 10.000 американски војници.
Од кабинетот на израелскиот премиер Бенјамин Нетанјаху соопштија дека „денешната акција против водечките челници на Хамас беше целосно независна израелска операција“. Во соопштението се додава: „Израел ја започна, Израел ја спроведе и Израел ја презема целата одговорност“.
Министерот за финансии на Израел од редовите на крајната десница, Безалел Смотрич, изјави дека нападот врз Доха испраќа јасна порака дека „терористите немаат и нема да имаат имунитет никаде во светот“. Тој акцијата ја оцени како „исправна одлука“ и ја пофали израелската армија и разузнавачките служби за, како што рече, „беспрекорното изведување“.
Од друга страна, портпаролот на иранското Министерство за надворешни работи, Есмаил Багаеи, на државната телевизија изјави дека израелската акција претставува „очигледно прекршување на меѓународното право“ и „задирање во националниот суверенитет на Катар и палестинските преговарачи“. Тој додаде дека овој напад мора да послужи како „сериозно предупредување за регионот и за меѓународната заедница“.
