„Прво изградба на болници во Кичево и Штип, а потоа нов Клинички центар во Скопје“, најави Мицкоски

Премиерот Христијан Мицкоски, одговарајќи на пратеничко прашање на денешната седница, истакна дека уште од првиот ден од преземањето на власта, здравствениот систем бил поставен како приоритетна тема за новата Влада.

Тој потсети дека неговата прва теренска посета и јавна изјава била токму од Клиничката болница во Штип, симболично покажувајќи дека здравството ќе биде во фокусот на реформските процеси.

„Она што го затекнавме беше навистина алармантно – целосен хаос, нерегуларности, натрупани долгови и еден систем во кој владеело безредие,“ нагласи Мицкоски, опишувајќи ја состојбата во која се наоѓал здравствениот сектор кога новата влада ја презела одговорноста.

Во своето обраќање, Мицкоски го најави и големиот инвестиционен пакет во здравството, кој ќе се реализира преку стратешкиот договор со Обединетото Кралство.

„Во следниот период, преку овој кредитен механизам ќе бидат вложени над 200 милиони евра во здравствениот систем. Парите ќе бидат наменети за довршување на Клиничката болница во Штип, изградба на нов Медицински факултет и студентски дом со капацитет од 200 легла, како и за изградба на нова болница во Кичево и целосна реконструкција и опремување на клиничката болница во Тетово,“ најави премиерот, истакнувајќи дека станува збор за најголема инвестиција во здравството во последните децении.