Филипче до Мицкоски: Никогаш не се преговарало за јазикот и идентитетот

На денешната седница за пратенички прашања, претседателот на СДСМ, Венко Филипче, упати сериозно предупредување до премиерот Христијан Мицкоски и Владата во врска со најавите за можноста да се прифати амандман во Европскиот парламент кој, според него, би можел да го доведе во прашање статусот на македонскиот јазик во европските документи.

Филипче изрази загриженост поради можниот ризик за националните интереси и потсети на неколку клучни документи кои, како што истакна, јасно ја потврдуваат позицијата на македонскиот јазик.

„Поради тоа што таква додавка пред македонскиот јазик и нација оди спротивно на заклучоците кои што ова Собрание ги донело, а тоа е дека во ниту еден контекст, во ниту еден момент, ниту за јазикот, ниту за културните, ниту за историските одредници – никој нема право да преговара. За јазикот никогаш не се преговарало. Тоа биле нашите црвени линии. И затоа е таков, чист јазикот: без фусноти, без додавки, без ништо. И таков е и така е во буквално сите документи“, рече Филипче.