Половина од учениците со сите петки паднале на приемен испит за во „Георги Димитров“

Министерката за образование и наука, Весна Јаневска, денеска од собраниската говорница ја изнесе загрижувачката статистика од последниот приемен испит за запишување во гимназијата „Георги Димитров“.

Според неа, од вкупно 75 ученици кои се пријавиле како одлични и со највисоки оценки од основното образование, дури половина не успеале да го положат приемниот испит. Овој податок, како што посочи Јаневска, е показател за сериозен проблем во образовниот систем – разликата помеѓу оценките што ги добиваат учениците и нивното реално знаење.

„Можеме со измена во законот, како што ние рековме, наставнички совет да нема право да поправа оценки. Завчера во „Георги Димитров“ полагаа 75 ученици со сите петки, а 50 проценти не го положија испитот. Нема повеќе поправање на оценки на наставнички совет. Ако сака ученикот да поправи оценка, ќе си дојде заедно со родителот и ќе полага пред комисија, а не со кревање рака на наставнички совет затоа што родителот ни се допаѓа или затоа што така рекол градоначалникот. Нови измени на законот ќе правам за се што ќе видам дека не функционира на терен затоа што неопходно е системот на образование да профункционира. Младите ни отидоа затоа што не функционира системот на образование, затоа што оние што заслужиле петки не сакаат оној што има двојка да му се поправи оценката во петка на наставнички совет“, кажа Јаневска.