Апелацискиот суд ја укина првостепената пресуда во случајот „Беса Транс“ и го врати предметот на повторно судење. Од судот информираат дека жалбите поднесени од обвинетите, како физичкото така и правното лице, биле уважени, по што пресудата е поништена и случајот ќе се разгледува повторно.
Случајот е поврзан со кривичното дело „фалсификување на исправа“. Во првостепената постапка, Кривичниот суд во март годинава донесе пресуда со која сопственикот на „Беса Транс“, Беким Хаџиу, беше осуден на една година и осум месеци затвор. Дополнително, на правното лице му беше изречена парична казна од 800.000 денари и забрана за вршење меѓународен превоз во период од четири години.
Апелацискиот суд утврдил дека постојат основи за повторно разгледување на случајот поради наводни неправилности во текот на првостепената постапка.
