Рано утрината на 12 декември 2024 година, Телеметриската сеизмолошка мрежа на Македонија регистрира два земјотреси со епицентри лоцирани во соседната Република Косово. Според податоците од Сеизмолошката опсерваторија при Природно-математичкиот факултет во Скопје, земјотресите се забележани во 01:46 и 03:59 часот.
Првиот земјотрес имал епицентар на околу 76 километри северозападно од Скопје. Локалната Рихтерова магнитуда била ML 4.0, а истиот бил почувствуван во северозападниот дел на Македонија со интензитет од IV степени според Европската макросеизмичка скала (ЕМС).
Вториот земјотрес бил со епицентар на околу 66 километри северозападно од Скопје. Неговата локална Рихтерова магнитуда изнесувала ML 3.3, а бил почувствуван во западниот дел на државата со интензитет од III степени според ЕМС.
