Спектакл во најава: Познато кога се враќаат К-15 во акција (Видео)

Легендарните членови на К-15 ја одбележуваат 30-годишнината од формирањето на тимот кој во текот на децениите остави неизбришлив траен печат во срцата на многу генерации. По три децении од хумористичките скечеви до музичките изведби, К-15 најави спектакуларно враќање на сцената, кое ќе се случи на 16 мај 2025 година, во Спортскиот центар „Борис Трајковски“ во Скопје.

Картите за овој единствен настан ќе бидат достапни за продажба од 15 декември, а од К-15 ја повикуваат публиката да го прослави со нив големиот јубилеј. Во официјалното соопштение, тимот открива дека подготовките за шоуто ќе вклучуваат не само легендарни скечеви и музички настапи, туку и многу нови изненадувања и моменти кои сигурно ќе го насмеат секој присутен.

„30 години поминаа во одлично дружење, креативност и смеа. Во чест на нашето патување, подготвивме незаборавно шоу кое ќе биде целосно ново искуство, исполнето со енергија, љубов и многу смеа. Бидете со нас на оваа специјална вечер“, истакнуваат членовите на К-15.