Се интензивираат подготовките за новогодишната потрошувачка кошничка, која граѓаните може да ја очекуваат во текот на наредниот месец и ќе вклучува околу 500 производи, изјави Марјан Ристески, заменик министер за економија и труд.
Според него, завршени се сите потребни консултации со стопанските комори, синдикатите и Асоцијацијата за заштита на потрошувачите, со цел да се изготви кошничка која ќе одговара на потребите и можностите на граѓаните.
„Одржавме опсежни консултации со повеќе засегнати страни кои имаат влијание врз формирањето на цените на производите од значење за потрошувачите. Тоа го направивме во соработка со бизнис-секторот преку стопанските комори, како и со синдикатите и Организацијата за заштита на потрошувачите. На основа на темелна и внимателно подготвена анализа, наскоро ќе ја објавиме новогодишната кошничка. Очекуваме таа да вклучува повеќе од 500 производи, со фокус на оние кои се најчести на трпезите за новогодишните и божиќните празници. Дополнително, ќе има производи кои не беа дел од есенската потрошувачка кошничка,“ изјави Ристески.
Целта на оваа иницијатива е да се обезбедат поповолни цени за празничните производи, што ќе им помогне на граѓаните да ги намалат трошоците..
