Во Полициската станица во Велес, вчера 75-годишна жителка на градот пријавила измама од страна на непознато лице, при што и била одземена сума од 600 евра. Според изјавата на пријавителката, на 14 ноември 2024 година, лицето ја контактирало телефонски, претставувајќи се како човек од Скопје, и ја убедило дека има право на исплата од околу 20.000 евра. Меѓутоа, како услов за добивање на средствата, било побарано од неа да испрати 600 евра.
Според информациите, таа ги испратила парите преку автобус, но по кусо време повторно добила повик од истото лице. Во вториот разговор, лицето побарало дополнителни 1.500 евра, ветувајќи и дека со тоа ќе добие уште поголема сума. Ова ја навело жената да се посомнева и на крај да сфати дека станува збор за измама.
Полициските органи преземаат активности за расветлување на случајот и откривање на сторителот. Граѓаните се потсетуваат да бидат внимателни и да не веруваат на сомнителни телефонски повици кои вклучуваат барања за финансиски средства.
