Министерот за транспорт, Александар Николоски, заедно со премиерот Христијан Мицкоски, амбасадорката на САД, Ангела Агелер, директорот на ЈП за државни патишта, Коце Трајановски, како и претставници од Владата и градоначалници од Пелагонискиот регион, денеска го посетија градилиштето на автопатот Прилеп-Битола.
Министерот Николоски го означи денот како значаен, бидејќи во рок од само една недела започнува изградбата на два автопати во Македонија, меѓу кои и автопатот Прилеп-Битола, што според него, целосно ќе го промени транспортниот пејзаж на државата.
Со големо задоволство, министерот информира дека завршувањето на автопатот Прилеп-Битола, како и пуштањето во употреба на експресниот пат Градско-Прилеп, кој се гради во три делници, ќе овозможи значително побрз и поудобен превоз. Долната делница, од Градско до Дреново, ќе биде готова до Нова година, делот од Дреново до Фариш до март следната година, а целата рута до Прилеп ќе се комплетира во текот на следната година.
Со тоа, за околу три до три и пол години, патувањето од Скопје до Прилеп ќе трае околу еден час и десет минути, а до Битола околу еден час и триесет минути. Ова, според Николоски, ќе има значително влијание врз економскиот и комуникацискиот развој на регионот.
