Од понеделник, 28 октомври 2024 година, во Скопје е воведен нов начин на плаќање на билети за градскиот превоз преку повикување на бројот 185 или преку новата мобилна апликација „Skopjebus“. Овој систем овозможува патниците да купат билет за едно возење брзо и лесно, без промена во цената на билетот, која останува 40 денари, со вклучен ДДВ.
ЈСП „Скопје“ објави како ќе функционира новиот систем во автобусите од јавниот градски превоз во главниот град.
„За да купите билет, доволно е да го завртите бројот 185 од вашиот мобилен телефон. По поврзувањето, ќе слушнете „бип“ сигнал и автоматска порака која потврдува: ‘Купивте билет за едно возење со цена од 40 денари во HH’. Телефонот не треба да се приближува до валидаторот за време на повикот.Наплатата се врши веднаш по повикувањето и по добивањето на ‘бип’ сигналот, без оглед на тоа дали целосно сте ја преслушале пораката.По завршување на процесот, ќе добиете СМС порака која ќе содржи информација за времето и цената на купениот билет“, се вели во нивното соопштение.
Доколку патникот има проблем со телефонската сметка можно е да ги добие следниве пораки:
„Трансакцијата е неуспешна, немате доволно средства на вашата сметка“
„Трансакцијата е неуспешна, имате активирано забрана, јавете се кај вашиот оператор“
„Веќе купивте возен билет, обидете се подоцна“
„Трансакцијата е неуспешна поради технички причини“
„Трансакцијата е неуспешна, имате надминат лимит за користење на оваа услуга“
ЈСП Скопје ги информира корисниците на услугите на претпријатието дека функционирањето на старата мобилна апликација „Skopska“ ќе биде прекинато и истовремено почнувајќи од 30.10.2024 година ќе биде пуштена во функција новата мобилна апликација „Skopjebus“.
