Фото: Принтскрин
Драма се одвиваше на познатата грчка плажа Олимпик бич, каде млад турист од Србија спасил живот на повозрасен турист од Македонија кој бил на раб на давење.
Инцидентот бил опишан од очевидци во Facebook групата „Грчка инфо“, каде се наведува дека македонскиот турист уживал на одмор со сопругата. Додека заедно влегле во морето, држејќи се за рака, до околу 50 метри од брегот, наеднаш настанала паника – мажот, кој не знаел да плива, заглавил во подлабока вода. Жената, која знаела да плива, не можела да му помогне, а веднаш потоа одекнал повик за помош.
Во тој критичен момент, млад Србин кој се одмарал на лежалка, без двоумење скокнал во водата. Со голема брзина допливал до давеникот и успеал да го извлече на брегот, каде за среќа се нашла и докторка, исто така туристка, која веднаш започнала со прва помош и реанимација.
Благодарение на брзата реакција и координираната помош од присутните, мажот успеал да се стабилизира – започнал да дава знаци на живот, мрдајќи ги екстремитетите. Набрзо потоа пристигнала и Итната медицинска служба, која го транспортирала до најблиската болница за дополнителен преглед и нега.
