Млади брачни парови ќе добиваат по 100.000 евра ако се преселат на село и станат земјоделци

Млади брачни парови кои се подготвени да започнат нов живот во рурална средина и да се посветат на земјоделство ќе можат да добијат финансиска поддршка до 100.000 евра. Средствата се наменети за инвестиции во изградба или адаптација на земјоделски објекти, купување механизација, обработливо земјиште или сточен фонд.

Оваа мерка е дел од новиот Предлог-закон за земјоделство и рурален развој, објавен на Електронскиот национален регистар на прописи (ЕНЕР) и достапен за јавна дискусија. Целта на законот е да се оживеат селските подрачја и да се мотивираат земјоделците на заедничко делување со цел подобрување на нивната конкурентност на пазарот.

За да може еден брачен пар да стане корисник на оваа финансиска поддршка, треба да ги исполни неколку основни услови: двата партнери да не се постари од 40 години, активно да се занимаваат со земјоделска дејност и во следните десет години постојано да живеат и работат во рурална средина, како дел од сопствено семејно земјоделско стопанство.

Според членот 138 од предложениот закон, поддршката ќе покрива до 80% од вкупните прифатливи трошоци, со максимален износ од 6.000.000 денари по брачен пар. Средствата ќе се доделуваат врз основа на одобрен деловен план, а периодот на користење ќе биде три години – колку што трае еден проектен циклус. Спроведувањето на програмата ќе биде во надлежност на Агенцијата за поддршка на земјоделството и руралниот развој.