Фото: Принтскрин
Сè почесто, матурантските прослави добиваат неофицијално продолжение во ноќни клубови и дискотеки кои функционираат надвор од законските рамки. Една таква забава, организирана без дозвола, заврши со полициска интервенција и затворена дискотека – на разочарување на десетици матуранти од скопска гимназија кои, според објавата на Телма, платиле значителни суми за да резервираат простор.
Забавата, која се одвивала по полноќ, следела веднаш по официјалната матурска вечер организирана од училиштето во ресторан. Неофицијалната забава била координирана преку соученик и се одржала во клуб лоциран во објектот на Железничката станица во Скопје.
Цените биле високи – влезот изнесувал 300 денари, маса за стоење се наплаќала 4.500 денари, додека за сепаре родителите и учениците плаќале и до 15.000 денари. Иако присутните очекувале вечер исполнета со музика и забава, нивните планови биле прекинати од полициска рација.
На терен пристигнале полициски службеници заедно со инспектори од Пазарната инспекција, кои по извршен надзор утврдиле дека објектот работел без соодветна дозвола. Како резултат, клубот бил пломбиран, а матурантите останале пред неговите затворени врати, објави „Телма“.
Да потсетиме, пред повеќе од два месеци се случи страшниот пожар во Кочани, каде што дискотека работела без дозвола и животот го загубија 62 лица, а над 250 беа повредени.
