Арсовска добила закани по живот – случајот ќе го пријави во полиција

Градоначалничката на Скопје, Данела Арсовска, преку видео објава на својот официјален профил на Фејсбук упати сериозни обвинувања за нелегална експлоатација на коритото на реката Вардар од страна на приватна фирма. Според неа, компанијата дејствува без никакви законски основи – без лиценци, без соодветна техничка документација, ниту дозволи за вршење на активноста или за користење на механизацијата.

Арсовска предупреди дека ваквото неконтролирано ископување не само што е незаконско, туку претставува директна закана по животната средина и здравјето на граѓаните. Таа ја потенцираше итната потреба од институционална реакција и одговорност.

Во истата објава, градоначалничката излезе со шокантно тврдење дека добила закани по својот живот, како и по безбедноста на членовите на нејзиното семејство. Заканите, како што посочи, биле изречени во присуство на сведоци. Поради тоа, Арсовска најави дека ќе поднесе кривична пријава против лицето Ќ.О. и неговите соработници, со што случајот добива и правна димензија.