Фото: Елвин Шакиров
По поднесувањето на обвиненијата во случајот „Онкологија“, кој ги потресе јавноста, не стивнуваат реакциите од граѓаните. Обвинети се неколку лекари – онколози и поранешни директори на Клиниката за онкологија, кои се товарат за тешки кривични дела поврзани со злоупотреба на скапа и животозагрозувачка терапија. Според обвинителството, тие свесно го загрозиле здравјето и животите на онколошките пациенти преку манипулации со лекувањето.
Социјалните мрежи се преплавени со потресни сведоштва на луѓе кои изгубиле блиски роднини во борбата со ракот, а кои се лекувале токму на оваа клиника. Граѓаните, со длабока болка и огорченост, споделуваат дека нивните најблиски можеби биле жртви на кражба на терапија – нешто што, како што велат, им ја одзело шансата за преживување.
Меѓу најемотивните реакции се издвои објавата на Елвин Шекиров, студент по медицина од Штип, кој својот професионален пат го гледа токму во областа на онкологијата. Неговата мајка, која починала пред седум години од рак на дојка, била пациент на еден од лекарите кои сега се на обвинителна клупа.
