Фото: Принтскрин
По повеќе од две децении исполнети со неизмерна борба и осум загубени бремености, Соња и Марко Миротиќ конечно го остварија својот најголем сон – да станат родители. Нивната ќерка Богдана е симбол на истрајност, љубов и верба, потсетувајќи нè дека чудата навистина постојат и дека надежта не треба никогаш да згасне, без разлика колку е тежок патот.
Неверојатното родителско патување на оваа брачна двојка од Грбавац, кои денес имаат 57 и 61 година, доби среќен крај благодарение на современите медицински технологии и стручноста на Центарот за вештачко оплодување (ИВФ) при Клиничката болница „Аџибадем Систина“ во Скопје.
Соња Миротиќ се породи на 57-годишна возраст, со што стана една од ретките жени во регионот која станала мајка на таа возраст. Таа со благодарност зборува за своето искуство со македонскиот гинеколог д-р Младен Ристовски, потенцирајќи дека сите подготовки и медицински третмани биле координирани со него.
„Имавме исклучително добра консултација и прием кај д-р Ристовски. Сè што направивме во Подгорица беше во согласност со неговите упатства. Му благодарам на Бога што денес ја држиме нашата ќерка во раце“, вели Соња.
Нејзиниот сопруг, Марко, не може да ја сокрие среќата и емотивноста, истакнувајќи: „Богдана е сè за мене. Цел живот чекав на овој момент.“
