Фото: Принтскрин
Лидерот на СДСМ, Венко Филипче, на денешната прес-конференција ја изрази својата загриженост за, како што рече, недостигот од транспарентност и јасни информации во врска со најавените договори за заем од дури 6 милијарди евра што Владата планира да ги склучи.
Според него, на јавноста ѝ се пласираат само фрагментарни податоци, а целокупниот процес се води зад затворени врати, без вклученост на релевантните институции и политички чинители.
Филипче нагласи дека според изјавите на премиерот и заменик-премиерот, се работи за два документи – еден во форма на договор за стратешка соработка и друг како заем со Обединетото Кралство.
„Ова е првпат нашата земја да се соочи со финансиски аранжман од вакви размери – 6 милијарди евра. Јавноста, но и институциите, мора да бидат детално информирани. Не смееме да дозволиме договори од ваков карактер да се потпишуваат без дебата и без транспарентност“, рече Филипче.
Тој побара Владата веднаш да излезе со прецизни информации за изворот на средствата: „Дали се работи за средства од британската влада, или станува збор за приватен фонд со седиште во Обединетото Кралство, кој управува со капитал од други држави?“
Осврнувајќи се на каматните услови, лидерот на СДСМ изрази загриженост поради отсуството на детали: „Не знаеме ништо за каматите, роковите, ниту за можните ризици по јавниот долг. Станува збор за средства што ќе ги отплаќаат идните генерации и затоа мораме да знаеме сѐ – до последен денар“.
