Српскиот бизнисмен се јави од болница откако беше претепан пред хотел

Саша Мирковиќ, сопственик на српската продуцентска куќа и телевизија „Хајп“, кој беше жестоко претепан во центарот на Загреб пред хотелот „Шератон“, првпат јавно се огласи по нападот. Од болничкиот кревет, по извршена операција на повредената рака, Мирковиќ ја сподели својата верзија на настанот преку видео објава на TikTok.

Во видеото, тој тврди дека зад нападот стои менаџерот на фолк-ѕвездата Цеца Ражнатовиќ – Велибор Поповиќ Поп. Според неговите зборови, Поповиќ е директно одговорен за обидот за негов живот, нагласувајќи дека ова не било обичен конфликт, туку намерен и насилен чин.

„Сакам да им се заблагодарам на сите што прашуваат за мојата здравствена состојба. Вчера навечер ми беше извршена операција на раката…“, вели Мирковиќ во видеото. Тој тврди дека напаѓачот го удрил одзади по главата додека излегувал од своето возило пред хотелот. По првиот удар, паднал на земја, а потоа следела серија удари, меѓу кои и еден кој резултирал со скршеници на три места на раката.

„Тоа не беше тепачка. Тоа беше обид за убиство. Не се работи за некој инцидент – ова беше планирано. Камерите ќе го потврдат тоа. Никој не излезе од хотелот за да помогне. Само ме напаѓаа“, вели Мирковиќ, додавајќи дека полицијата веќе издала налог за апсење на осомничениот.