Фото: Ракометна федерација на Македонија
Македонската ракометна репрезентација вечерва од 18:00 часот ќе истрча на теренот во Талин, каде ќе се соочи со селекцијата на Естонија во рамките на претпоследното коло од квалификациите за Европското првенство. Победата е императив за избраниците на селекторот Кире Лазаров доколку сакаме да останеме во трка за пласман на големото натпреварување.
Пред нашите ракометари стојат два решавачки натпревари – денешниот дуел на гости против Естонија и завршниот меч против Литванија на домашен терен. Синоќешната победа на Словенија против Литванија ја отвори вратата за Македонија самата да ја обезбеди својата судбина и пласман на ЕП, но за тоа е потребно да се победи и денеска и викендов.
И покрај тоа што Естонија има негативен биланс со четири порази во квалификациите, нивните игри покажуваат дека не смеат да се потценат. Во Талин беа поразени минимално од Словенија, а во претходниот меѓусебен натпревар одигран во Скопје, нашите ракометари славеа со четири гола разлика.
