Фото: Гордана Силјановска Давкова
Хрватскиот претседател Зоран Милановиќ, кој престојува во официјална посета на Македонија, испрати јасна и поддржувачка порака до властите во Скопје – земјата не треба да прифаќа уцени и политички притисоци како услов за напредок кон Европската Унија.
„Добивате многу совети од различни страни – од соседите, од меѓународната заедница, од Европската комисија. Но, не секој совет е неопходно добар и применлив. Вие самите знаете што е најдобро за вашата земја и треба да одлучувате според вашите интереси,“ нагласи Милановиќ.
Тој се осврна и на ветото од страна на Бугарија, потенцирајќи дека е очигледно оти консензусот е неопходен во процесот на проширување на Унијата, но предупреди дека не смее да се дозволи Македонија да биде ставена во улога на заложник.
„Не дозволувајте да бидете предмет на уцени или принуди. Прашањето е едноставно – дали за вас и вашите граѓани ЕУ сè уште е приоритет број еден, или има и други важни цели кои може паралелно да се следат и реализираат,“ додаде тој.
