Екс-директор на Здравствен дом незаконски вработил 127 лица и им исплатил над 21,5 милиони денари

Секторот за внатрешни работи Куманово информира дека поранешен директор на Јавната здравствена установа „Здравствен дом“ Куманово е осомничен за сериозни нерегуларности во своето работење. Според полицијата, тој без претходна согласност и без да го извести надлежното Министерство за здравство, самоволно вработил вкупно 127 лица.

„СВР Куманово поднесе кривична пријава против Ф.А. од Куманово поради постоење основи на сомнение за сторено кривично дело „злоупотреба на службената должност и овластување“ по член 353 став 4, во врска со член 45 од Кривичниот законик.

Пријавениот – како директор на Јавната здравствена установа „Здравствен дом“ Куманово, во периодот од 2020 до 2024 година склучувал незаконски договори на дело и вработувал лица во установата без претходно да добие одобрение од Министерство за здравство, а потоа и без да обезбеди согласност од Министерството за финансии незаконски вработил вкупно 127 лица, со што постапил спротивно на Закон за работни односи и спротивно на Закон за трансформација во редовен работен однос. констатирано од Државен инспекторат за труд.

На тие лица, пријавениот незаконски им исплатил плати во вкупен износ од 21.594.510 денари и за таа сума го оштетил буџетот на ЈЗУ „Здравствен дом“ Куманово“, се вели во соопштението.