Фото: Принтскрин
Македонските фудбалски легенди денеска забележаа победа од 3-2 против бугарските ветерани на хуманитарниот натпревар одигран во Варна. Мечот беше организиран со цел да се соберат средства за помош на семејствата настрадани во трагичниот пожар во Кочани.
Први до водство дојде Македонија, благодарение на погодокот на Ристо Божинов. Сепак, домашната селекција брзо возврати преку Камбуров, израмнувајќи на 1-1.
Во финишот на првото полувреме, Горан Пандев реализираше пенал и ја врати предноста на страната на македонската екипа. Но, радоста беше краткотрајна, бидејќи Петар Михтарски успеа да постигне нов изедначувачки гол за Бугарија.
Клучниот момент се случи по речиси еден час игра, кога Дарко Тасевски со прецизен удар донесе конечна победа за македонските легенди.
Средствата собрани од овој настан ќе бидат целосно наменети за поддршка на семејствата кои беа погодени од трагедијата во Кочани.
