Фото: Стевчо Јакимовски
Основниот кривичен суд во Скопје денеска ја соопшти пресудата во случајот против Стевчо Јакимовски, кој беше обвинет заедно со уште едно лице, поранешен службеник во Општина Карпош, објави „Скопје1“.
Судот ги прогласи двајцата за виновни по поднесеното обвинение. Според пресудата, тие се товареа за злоупотреба на службената положба и овластување во врска со дејствувања во локалната самоуправа.
„Двајцата обвинети ги огласи за виновни за кривичните дела кои им се ставаат на товар и ги осуди на начин што: С.Ј. се осудува на единствена казна затвор во траење од 3 години 6 месеци, додека Т.Ѓ. му изрече алтернативна мерка – Условна осуда во траење од 2 години затвор која нема да се изврши доколку во следните 5 години не стори ново кривично дело.
Откако постапката почна одново, поради промена на претседателот на советот, а како странките се согласија претходно изведените докази да бидат прочитани, за помалку од една година, овој предмет заврши во прв степен. Со оглед дека поради измените на Кривичниот законик во однос на кривичното дело Злоупотреба на службената положба и овластување од член 353, застареа стотици предмети, а како Јавното обвинителство ја продолжи кривичната постапка против обвинетиот С.Ј, по наоѓање на овој суд не може да стане збор за продолжено кривично дело, бидејќи ниту временски, ниту пак според начинот и приликите на сторување може да стане збор за такво дело, па од тие причини судот донесе пресуда со која го одби обвинението од став I точка 1 и точка 2 од Усогласениот обвинителен акт, согласно член 402 став 1 точка 6 од Законот за кривична постапка, бидејќи кривичното гонење не може да се преземе поради застареност“, соопшти Судот.
Целата пресуда може да се прочита ТУКА.
