Голема полициска акција во Македонија – се апсат корумпирани доктори

На повеќе локации низ Македонија денеска се спроведува обемна полициска акција под водство на Бирото за јавна безбедност при Министерството за внатрешни работи. Операцијата е насочена кон разбивање на организирана мрежа која, според неофицијални информации, со години наназад злоупотребувала здравствени и социјални бенефиции преку прикажување лажни медицински дијагнози, се вели во објавата на „News24Live“.

Истрагата се фокусира на сомневања за фалсификување здравствени наоди со цел обезбедување на право на парична надомест за туѓа нега, како и за незаконско добивање и користење на инвалидски пензии. Неофицијално, во мрежата се вклучени над 50 лица, меѓу кои се лекари, адвокати, член на комисија во Фондот за пензиско и инвалидско осигурување, управител на консултантско биро, како и вешто лице.

Претресите опфаќаат и простории на Клиничкиот центар „Мајка Тереза“ во Скопје, Клиничката болница во Тетово, како и Јавната здравствена установа Општа болница Велес, објави „News24Live“.

Повеќе детали се очекуваат во текот на денот од МВР.