Фото: Besar Durmishi
Министерот за економија и труд, Бесар Дурмиши, денеска на јавната расправа што се одржа во Собранието, го претстави Предлог-законот за работно ангажирање на лица, кој има за цел да понуди нови решенија за регулирање на повремената и сезонска работа.
Како што истакна министерот, овој закон претставува дел од пошироките напори на Министерството за економија и труд за сузбивање на сивата економија и зголемување на социјалната сигурност на работниците. Законските измени се насочени и кон спречување на иселувањето на младите, преку создавање на флексибилни, но и законски регулирани можности за вработување.
Министерот Дурмиши нагласи дека предложените решенија ќе им овозможат на македонските компании полесен и формализиран пристап до работна сила, особено во дејности каде што сезонската работа е честа појава. Законот предвидува поедноставена процедура за ангажирање работници на повремени или сезонски работни позиции, со што се олеснува административниот товар како за работодавачите, така и за работниците.
Дополнително, предлог-законот предвидува можност за вклучување на различни категории граѓани – лица со старосна или семејна пензија, редовни студенти, приматели на социјална и детска заштита, како и невработени лица евидентирани во Агенцијата за вработување. Она што е особено значајно е што нивното ангажирање нема да влијае врз постоечките права и бенефиции што ги уживаат – како што се правото на паричен надомест, статусот на студент, социјална сигурност и други.
