Приведени уште седум нови полицајци за пожарот во дискотеката во Кочани

Истрагата за трагичниот настан што се случи во дискотеката „Пулс“ во Кочани добива нови димензии – Јавното обвинителство вечерва потврди дека се издадени наредби за приведување на уште седум полициски службеници.

Оваа информација ја соопшти јавниот обвинител Љупчо Коцевски во телевизиската емисија „Топ Тема“ на Телма. Според неговите зборови, новите приведувања се врз основа на дополнително собрани докази во рамки на истражната постапка.

Со ова, вкупната бројка на полициски службеници опфатени со истрагата се искачува на 14, имајќи предвид дека уште седум лица од полицијата беа приведени пред речиси еден месец во рамките на истиот случај.