Фото: Принтскрин
Бугарија не се смета себеси за пречка во процесот на евроинтеграција на Македонија, бидејќи, според официјалната позиција на Софија, условите што нашата земја треба да ги исполни произлегуваат од заеднички европски договор, а не од еднострана бугарска одлука.
„„Од наша перспектива, ситуацијата е сосема јасна. Нема простор за промена на нашата позиција, ниту причина да се отстапи од т.н. европски консензус постигнат во 2022 година. Сè што би можело да биде придонес на сите земји кои стојат зад овој консензус е добредојдено“, изјави бугарскиот министер за надворешни работи Георг Георгиев, гостувајќи во емисијата „Брисел 1“ на телевизијата Бугарија ON AIR.
Министерот посочи дека уставните измени и впишувањето на Бугарите во македонскиот Устав не се единствениот услов во процесот. Тој предупреди дека не треба да се создаде впечаток дека со исполнување на само еден услов ќе биде надминат целиот пакет обврски.
„Важно е да се разбере дека постојат и други чекори што произлегуваат од европскиот договор, и затоа никој не треба да биде изненаден ако и по уставните измени се појават и други барања,“ додаде Георгиев.
