Јовица Страшевски, правниот застапник на Љупчо Палевски – осомничен за двојното убиство на Вања Ѓорчевска и Панче Жежовски – изјави дека досега не е презентиран ниту еден релевантен доказ кој би го инкриминирал неговиот клиент како непосреден извршител на делото.
Во гостување на подкастот „Претрес со Ландов“, адвокатот нагласи дека Палевски категорично ги отфрла обвинувањата, а истакна и дека, и покрај интензивниот медиумски фокус и силниот интерес на јавноста, Обвинителството сè уште не изнело цврсти докази кои би ја поткрепиле вината на обвинетиот.
„Многупати сум го провоцирал Љупчо, му поставував директни прашања, а тој секогаш тврди едно исто: дека не ги убил Вања и Панче. Нема докази. Ако се појави барем еден, ќе се повлечам како адвокат и јавно ќе ѝ се извинам на јавноста“, истакна Страшевски.
