Вчера во 10:27 часот, на Граничниот премин Богородица, патничко возило марка „Ауди“ со српски регистарски ознаки, со голема брзина ја избегнало граничната контрола, притоа не застанувајќи за стандардните проверки. Наместо да се движи по вообичаената лента за патнички возила, возачот ја искористил автобуската лента и без дозвола влегол на територијата на Македонија, упатувајќи се по автопатот кон Скопје.
Во исто време, и Граничниот премин Евзони на грчка територија потврдил дека возилото на сличен начин избегнало гранична и царинска контрола, пробивајќи се без да застане. По добиеното известување, македонските безбедносни служби веднаш реагирале и презеле соодветни мерки за пресретнување на возилото.
По координирана акција на надлежните служби, автомобилот бил успешно запрен на наплатната рампа „Смоквица“, каде што била извршена детална контрола.
