Министерството за внатрешни работи информира дека Одделот за внатрешна контрола, криминалистички истраги и професионални стандарди поднел кривична пријава до Основното јавно обвинителство Охрид против А.М., полициски службеник во Полициската станица за општа надлежност Охрид при СВР Охрид.
Пријавата е поднесена поради основано сомнение дека полицискиот службеник извршил кривично дело – неовластено производство и пуштање во промет на наркотични дроги, психотропни супстанции и прекурзори, согласно член 215, став 1 од Кривичниот законик.
„Во временскиот период кога полицискиот службеник А.М. бил предвиден за работа и извршувал работни задачи на обезбедување на вила Бела (поранешна вила Македонија), сопственост на Министерството за внатрешни работи, од страна на вработени во Одделот за внатрешна контрола, криминалистички истраги и професионални стандарди бил извршен преглед врз А.М. и работната просторија- стражарската куќарка, при што од прегледот во работната просторија, на работната маса била затекната метална лажица во која имало бела прашкаста материја, хартиена салфетка во која имало бела прашкаста материја и мало пластично шише со нн течност, со импровизирана цевка од банкнота од 10 денари, затворено со алуминиумска фолија на отворот на шишето, на која имало остатоци од непозната материја“, се вели во полициското соопштение.
