Премиерот Христијан Мицкоски денеска изјави дека платите на здравствените работници за март ќе бидат зголемени за 15 отсто, а до крајот на мандатот се планира вкупно зголемување од 40 до 50 проценти.
Во рамки на својата посета на струмичко Ново Село, Мицкоски одговараше на новинарски прашања, при што потсети и дека од 1 април ќе започне исплатата на линеарно зголемените пензии, кои ќе бидат зголемени за 2.500 денари.
„Буџетот во здравството, во Фондот за здравстено осигурување (ФЗО) е историски највисок, 53 милијарди денари, споредено со оние 35 кои беа во времето на короната е за 18 милјарди повеќе. Се враќаат долгови што ги генерираше претходната Влада, така што генерално инвестициите во здравството за нас се многу важни“, кажа премиерот Мицкоски.
Владата, како што најави премиерот, останува посветена на подобрување на економските услови за здравствените работници и пензионерите, со цел да се унапреди нивниот финансиски стандард.
