На Клиниката за хируршки болести „Св. Наум Охридски“ во Скопје во моментов се згрижени десет пациенти кои беа повредени во трагичниот пожар што изби минатиот викенд во дискотеката „Пулс“ во Кочани.
Директорот на клиниката, д-р Небојша Настов, информира дека шестмина од пациентите се со потешки телесни повреди, односно со сериозни изгореници, и дека веќе им е извршена хируршка интервенција за трансплантација на кожа.
На прес-конференција што се одржа во Владата, д-р Настов нагласи дека останатите четворица пациенти се во стабилна здравствена состојба и, доколку закрепнувањето продолжи со исто темпо, се очекува да бидат испишани на домашно лекување во текот на наредната недела.
