Попладнево, околу еден час наназад, по дојава од загрижен граѓанин од општина Карпош, бил забележан голем пожар во близина на алпинистичката карпа и бетонската база на „ЕНГ Бетон“, лоцирани покрај кејот на реката Вардар. Веднаш по добиената информација, надлежните општински инспекциски служби реагирале навремено и ја известиле полициската станица Карпош, како и противпожарната служба.
Пожарникарските екипи брзо пристигнале на местото и за кратко време успеале да го локализираат огнот, спречувајќи негово понатамошно ширење. За среќа, нема повредени лица и материјалната штета е минимална.
Дополнително, полициските службеници затекнале неколку лица на самото место, кои биле фатени на дело додека го подметнувале огнот. Против нив ќе бидат преземени соодветни мерки и ќе им биде изречена законски предвидена санкција.
