Незаменлива улога во спасувањето на настраданите одигра младиот Јован, 19-годишно момче, кое во најтешките мигови на хаос, страв и паника, собра сили и храброст да влезе во запалената дискотека и да изнесе на безбедно дури 21 млад човек.
На социјалните мрежи се појавија бројни објави и пораки со благодарност за Јован, кого многумина го нарекоа „тивок херој“ на трагичната ноќ која ја зави Македонија во тага. Граѓаните со воодушевување зборуваат за неговата несебична храброст, упатуваат искрени пофалби и упорно повикуваат надлежните институции да го одликуваат со признание за неговото храбро дело, предлагајќи му орден за храброст.
Во една од објавите на социјалните мрежи сведочат дека Јован бил надвор од дискотеката во моментот кога избувнал пожарот. Без размислување, тој успеал да пронајде извор на вода, ја натопил својата маица и ја ставил преку лицето за да се заштити од чадот, а потоа преку страничниот влез влегол внатре со една цел – да извлече што е можно повеќе луѓе на сигурно.
