Фото: Принтскрин
Формално е отворена истрагата за трагичниот пожар кој избувна во дискотеката „Пулс“ во Кочани, а кој резултираше со загуба на човечки животи и бројни повредени. Истрагата се води против вкупно 27 физички и три правни лица, осомничени за различни кривични дела поврзани со овој немил настан.
Судот донесе одлука за продолжување на мерката притвор за 13 лица, меѓу кои се сопственикот на дискотеката, поранешниот министер за економија Крешник Бектеши, поранешниот директор на Државниот пазарен инспекторат Горан Трајковски, како и лица вработени во инспекциските служби, Министерството за економија и Дирекцијата за заштита и спасување, вклучително и ексдиректорот Беким Максути. Тие се сомничат за сериозни кривични дела, главно поврзани со тешки дела против општата сигурност, за кои законот предвидува казна затвор од три до 20 години.
Покрај нив, од вчера под истрага се и седум припадници на полицијата, кои според обвинителството, со своите постапки овозможиле дискотеката „Пулс“ да работи без соодветни дозволи и контроли. За нив е изречена мерка притвор во траење од 30 дена.
