Владата на Република Македонија на денешната седница донесе одлука за прогласување седумдневна жалост на територијата на целата држава, како израз на сочувство и почит кон жртвите од трагичниот пожар во дискотеката „Пулс“ во Кочани.
Седницата започна со едноминутно молчење, со кое владините претставници им оддадоа почит на сите што го загубија животот во оваа голема трагедија што ја потресе државата.
„На денешната вонредна владина седница по трагичниот настан во Општина Кочани каде во несреќен случај при пожар на дискотека животот го загубија 59 млади лица, а над 100 луѓе се хоспитализирани и им се укажува лекарска грижа, Владата донесе одлука за прогласување 7-дневна жалост на територија на целата држава. Секој да се придржува до одлуката, бидејќи казните за непочитување ќе бидат ригорозни. Во овие денови Министерството за надворешни работи ќе отвори книга на жалост во рамки на министерството за огромната несреќа која се случи“, информираше владината прес-служба.
