Пратеникот на ВМРО-ДПМНЕ, Бране Петрушевски вели дека работниците изразуваат силно незадоволство, тврдејќи дека се соочуваат со манипулации од страна на Слободан Трендафилов, додека тој и неговите блиски соработници уживаат значително повисоки месечни приходи.
Петрушевски на прес-конференција посочи дека нивните примања се повеќекратно повисоки од минималната плата, што дополнително ја зголемува фрустрацијата кај вработените.
„Дали синдикалецот на батерии на СДС и Левица, Слободан Трендафилов, со 75 илјади денари месечно во џеб ги манипулира работниците за минималец? Според информациите кои стигнаа до нас, само во текот на 2024 година и првите два месеци од 2025 година Слободан Трендафилов покрај платата од 75.000 денари, имал и примања по други основи, со што вкупната сума која ја земал во овој период е 1 милион и 688 илјади денари по основ на плата и договори. Ова е првиот синдикалец Трендафилов, кој според овие информации за 4 години прави 100.000 евра, со амин на СДС кои го поставија на таа позиција за да ги манипулира работниците. Во следните денови ќе бидат демаскирани сите негови соработници“, вели Петрушевски.
