ВМРО-ДПМНЕ обвинува дека претседателот на Сојузот на синдикатите на Македонија (ССМ), Слободан Трендафилов, не се залага искрено за правата на работниците, туку работи во интерес на опозициската СДСМ. Според нив, Трендафилов ја користи својата позиција за да ѝ возврати на партијата која, како што тврдат, незаконски го поставила на чело на ССМ, обезбедувајќи му привилегии.
– Наместо да води вистинска борба за работничките права, Трендафилов е ангажиран во политичка кампања за СДСМ. Додека оваа партија беше на власт, тој молчеше и не бараше зголемување на платите, а сега, кога СДСМ е опозиција, одеднаш станува активен – велат од ВМРО-ДПМНЕ.
Партијата истакнува дека неговите најави и барања се неосновани и без конкретни анализи, оценувајќи ги како диригирани од политичките кругови на СДСМ.
– Кога повеќе од половина милион граѓани едвај преживуваа со 150 денари на ден, а меѓу 70.000 и 80.000 луѓе во Македонија имаа само три пристојни оброци неделно, Трендафилов остана безгласен. Како дел од ССМ, не ја повика власта на СДСМ да ги зголеми платите за работниците, ниту да обезбеди подобри услови за живот – додаваат од ВМРО-ДПМНЕ.
