Здружението на инженери поднесе официјална претставка до Регулаторната комисија за енергетика (РКЕ), барајќи итни измени во правилата за снабдување со електрична енергија. Според нив, системот на паушално пресметување на потрошувачката доведува до неправедно високи сметки за домаќинствата, а воедно ѝ обезбедува значителни дополнителни приходи на компанијата ЕВН.
Инженерите тврдат дека ваквиот модел на наплата ѝ носи на компанијата околу 2 милиони евра годишно, само од разликите што се создаваат при паушалното проценување на потрошената електрична енергија.
Со воведувањето на блок-тарифите во 2022 година, РКЕ наложи броилата да се отчитуваат секој квартал, наместо еднаш годишно. Сепак, во реалноста, инженерите укажуваат дека често се применува паушално пресметување, што може значително да ја зголеми цената што ја плаќаат граѓаните.
„Само со ±10% разлика во проценетата потрошувачка, корисниците можат да бидат префрлени во поскап ценовен блок. Тоа значи зголемени трошоци за домаќинствата, без да има реална основа за тоа“, се вели во реакцијата на Здружението на инженери.
