Вицепремиерот Александар Николоски упати критика кон поранешниот претседател Стево Пендаровски, повикувајќи го да не ја поткопува позицијата на Македонија со своите изјави.
Реакцијата на Николоски доаѓа по вчерашното интервју на Пендаровски за телевизија „Сител“, во кое тој ја критикуваше актуелната надворешна политика на Владата.
Во објава на својот официјален профил на Фејсбук, Николоски му порача на Пендаровски да се повлече од политичките дебати и да не нанесува штета на угледот на државата.
„Стево Пендаровски – човек кој два пати изгуби Претседателски избори, вториот пат со историски најголема разлика, после 10 месеци реши да се појави во јавност и да го напаѓа Премиерот Мицкоски и ВМРО-ДПМНЕ заради поддршката на САД и Претседателот Трамп.
Пендаровски кој иако вети не се откажа од доживотна пензија на грб на граѓаните, го напаѓа Претседателот на нашиот стратешки партнер број 1. Арогантно дели ,,ум” на светски лидери, а сам себе не се гледа.
Човекот кој масовно ја злоупотребуваше Агенцијата за разузнавање со наредба да фабрикувааат извештаи за нас од ВМРО-ДПМНЕ дека сме ,,проруски” , ,,антизападни” , ,,антиамерикански” , за мене слушам напишале дека сум претставник на ,,иранско – турско – унгарско влијание” и пуштаа гавази да ги молат стратешките партнери пола од носителите на листи на ВМРО-ДПМНЕ да завршат на црна листа за така да се спасат од пораз, истиот тој сега е најантизападен и најантиамерикански.
Стево троши пензијата, не се брукај , не ја руши позицијата на Македонија и дружи се со пријателите од Агенција за разузнавање додека можеш“, напиша Николоски.
