Доколку не се постигне договор со Владата околу зголемувањето на минималната плата и исполнувањето на обврските од Колективниот договор за јавниот сектор, постои голема веројатност да се повтори минатогодишното сценарио, при што работниците би излегле на протест на 2 и 7 април.
Ова денеска го најави претседателот на Сојузот на синдикати на Македонија (ССМ), Слободан Трендафилов, на прес-конференција, нагласувајќи дека синдикатот нема да дозволи работничките права да бидат загрозени.
Трендафилов остро ги осуди политичките напади врз ССМ, потенцирајќи дека синдикатот е независен и дека секој обид за негово поврзување со одредени политички структури е апсурден.
„Очекувавме Владата да покаже разбирање и да излезе во пресрет на барањата за зголемување на платите, но наместо тоа, се соочуваме со напади и дискредитации од политички кругови. Тврдењата дека ССМ делува во координација со опозицијата се бесмислени и неприфатливи,“ изјави Трендафилов.
