Актуелниот министер за локална самоуправа, Златко Перински, најави дека ВМРО-ДПМНЕ ќе настапи на претстојните локални избори со детално разработена изборна програма, насочена кон целосни и системски решенија за најважните проблеми со кои се соочува главниот град. Според него, без разлика кој ќе биде нивниот конечен кандидат за градоначалник на Скопје, граѓаните ќе добијат јасна визија за подобрување на урбаното живеење.
Гостувајќи во емисијата Вин-Вин, Перински нагласи дека успешното управување со локалната самоуправа зависи од иницијативата, посветеноста и истрајноста на градоначалникот. Тој истакна дека во Македонија постојат општини што функционираат ефикасно и финансиски стабилно, но и такви што се заглавени во долгови и неуспешно управувани, што, според него, е резултат на лоши политики и недоволна отчетност во минатото.
Министерот се осврна и на предложените измени на Законот за локална самоуправа, кои предвидуваат можност за референдумски отповик на градоначалник. Како што посочи, „никој не треба да има загарантиран четиригодишен мандат без можност за одговорност пред граѓаните“, нагласувајќи дека ваквите промени ќе придонесат за поголема транспарентност и контрола врз работата на локалните власти.
