Голем број луѓе дојдоа да се простат од Саша Поповиќ на комеморацијата во Сава центар, а со своето потресно обраќање, Марија Шерифовиќ ги расплака сите присутни.
– Многу нешта во животот нè затекнуваат неподготвени, а ти, Сале мој, сега навистина нè изненади. Сите нас… а еве и мене, по којзнае кој пат. Никогаш не сум го правела ова, не знам ниту како човек се подготвува за вакви моменти, особено кога зад мене стои слика на „некој мој“.
Од сите луѓе што се денеска овде, можеби јас те познавав најкратко, но во последниве десетина години поминав толку многу време со тебе, што имам чувство дека си дел од мојот живот од кога знам за себе.
Кога бев помлада, те знаев како дел од „Слатки грех“, како десна рака на Брена, како професионалец… Години подоцна, и како свој колега, како наш директор, но најгорда сум што пораснав достојна да ме нарекуваш свој пријател, и што денеска можам да стојам овде, пред твоето семејство и твоите најблиски.
Никогаш не сум запознала некој кој толку многу гореше, кој со толку многу страст го живееше овој наш занает… Верувам дека секој во оваа сала сега само чека да се појавиш од некој агол и да почнеш да нè распоредуваш на сцената, да ни кажеш кој што треба да каже или да направи…
Бидејќи денес, кога те нема тука, а сите сме дошле поради тебе, на сите ни е болно јасно дека ништо повеќе нема да биде исто… И тоа не само на естрадата и во шоу-бизнисот, туку и во душата… Од која ни однесе дел пред пет дена. Добро знаеш ти дека ќе ни недостигаш, а јас дури и не можам да замислам колку…
