Премиерот Христијан Мицкоски, во интервју за централниот дневник на телевизијата АЛСАТ-М, истакна дека размислува за промена на државниот грб, но категорично отфрли каква било можност за менување на македонската химна.
Мицкоски нагласи дека не само што не размислува во таа насока, туку ниту му паѓа на памет да влегува во таква дискусија.
„Државниот грб е прашање кое е отворено за дискусија, но химната е нешто што не треба и нема да се менува. Таа е еден од трите најважни симболи на државноста и претставува историска нишка која ја раскажува приказната за создавањето на нашата држава и нација. Медиумските брифинзи кои беа објавени во јавноста создадоа интерес за оваа тема, а прашањето ми беше поставено токму врз основа на тие информации. Одговорот што го дадов беше внимателен и заснован на фактот дека уште за време на претходната влада, кога Никола Груевски беше премиер, постоеше договор за евентуална промена на грбот. Но, што се однесува до химната – не гледам ниту една причина за нејзина промена, ниту пак има простор за такви дебати“, нагласи Мицкоски.
