Македонските граѓани речиси цела година се изложени на загаден воздух, што претставува сериозна закана по нивното здравје.
Според податоците од 2019, 2020 и 2021 година, Македонија е водечка во Европа по највисока средногодишна концентрација на PM2.5 честички, која изнесува 30.3 μg/m3. Повеќе од половина од населението секојдневно вдишува воздух со високо ниво на загадување, што е крајно алармантно.
Според анализите на „О2 Иницијатива“, по Лазарополе, најчист воздух во просек има во Миладиновци, потоа следуваат Ѓорче Петров и Гази Баба во Скопје, како и Охрид и скопската населба Карпош. Од друга страна, најзагадени се Кичево, Струмица и Лисиче, а веднаш по нив е Кавадарци.
Чист воздух се регистрира и во Кочани и Миладиновци, каде што условите се прифатливи околу месец и половина годишно. Во Охрид и на периферијата на Битола, овој период се сведува на половина месец, додека на останатите мерни станици, во најдобар случај, воздухот е квалитетен само два до девет дена во годината.
